"شرفلی میللت اوز بایراغی آلتیندا یاشار"
میللی اونده ر،دوکتور چوهره قانلی
ییرمینجی یوز ایلین سون اون ایللیینده شوروی ایمپریاسی نین داغیلماسی ایله باغیمسیز تورک دولتی بایراغی نین سایی 1- دهن 6- یاقدهر آرتدی. بونون نده نی قوزئی آذربایجان، تورکمنستان، اوزبکستان، قیرغیزیستان و قازاقستان تورک لری نین روس اسارتینده ن قورتولما قلاری ایله یاناشی باغیمسیز دولت لرینی قورماقلاری ایدی. یئنی یوز ایللیین آستاناسیندا اسارتده یاشایان گونئی آذربایجان، اویغور، کرکوک و ... تورک لری ده اوز عصیان بایراقلارینی تصدیق له یه ره ک باغیمسیزلیق اوغروندا مبارزه آپارماقدادیرلار.اوسته لیک 30 ایلده ن آرتیق قوزئی قبرس تورک لری نین باغیمسیز لیغینین اعلان ائدیلمه سینه باخمایاراق هه له ده بیرلشمیش میللت لر طرفیندهن باغیمسیزلاری نین رسمیته تانینماسی نی گوزله ییرلر.
وورغولاماق گره ک لیدیرکی، تورک سولالهلری تاریخین باشلانقیجیندان اوزون و یا خود قیسا حکمدارلیق لارینا باخمایاراق چوخ سایلی بایراقلار تاریخین صحیفه لرینده حک ائدیب لر. بوگون تورک حکمدارلاری نین تاریخینه نظر سالارساق هر بیر تورک سولالهسینین دینی اعتقادینی، ماراق وایسته ینی، دونیا گوروشونو و بیر سوزله مفکوره سی نی اونون یاراتدیغی بایراغیندان اویره نمک اولار. نیه کی، بایراق میللتین یوخ حکمدارلارین سیمگه سی سایلیردی . محض بونا گوره ده حکمدارلیق سولالهلری نین یاراتدیقلاری بایراقدان آیدین اولورکی، اونلار اوزمفکوره لرینی حکمدارلیق ائتدیی اراضی لرده یایماقلا حاکمیت لرینی برکیتمک اوچون تابعلیینده اولان میللت لری ایسته دیک لری کیمی فورمالاشدیریردیلار. بونا اورنک عینی تورک سویوندان اولان صفوی و عثمانلی حکمدارلاری دیر. صفوی لر حکومتینده حاکمیت ده اولان صفوی حکمدارلاری اساسا شیعه چیلییی قابارداراق اوزلرینه بیر مذهبی کیملیک یاراتماقلا عثمانلی حکومتینده حاکمیت ده اولان عثمانلی حکمدارلاری ایله فرقلندیلر. حتی صفوی حکمدارلاری داشیدیقلاری مذهبی مفکوره لرینی اوز بایراغیندا حک ائده ره ک (یاشیل = شیعه چیلیک) تابعلیینده اولان آذربایجان تورک لرینی و باشقا میللت لری اوز مذهبی اعتقادی چرچیوه سنیده فورمالاشدیرماغا نائیل اولدولار.
بیرینجی دونیا ساواشیندان سونرا اورتاشرق، اورتا آسیا و قافقازین ژئوپولیتیکاسی تمامی ایله آلت – اوست اولاراق بو اراضی لرده حکمرانلیق ائدهن تورک شاهلاری نین، خانلاری نین حاکیمیتینه سون قویولدو. سوزو گئدهن ساوشدان غالیب چیخان غرب دولت لری نین یاردیمیلا عثمانلی تورک لری نین حاکیمیتی آلتیندا یاشایان چوخ سایلی میللت لره باغیمسیزلیق قازاندیریلدی . عثمانلی ایمپریاسی نین وارثی سایلان تورکیه ده مدرن تورک دولتی یاراندی. اونون مقابلینده ایسه اینگیلتره کشفیاتی نین آلتینجی تملی (M.I.6) بیر باشا یاردیمیلا بوگون ایران آدلانان اولکه ده عصرلرله حاکیمیت ده اولان تورک لرین حاکیمیتینه بیر دفعه لیک سون قویولاراق فارس شاهلیق اصولو ایله اداره اولونان مدرن دولت قورولدو. قافقازدا قورولان شرقین ایلک دموکراتیک جمهوریتی (آذربایجان) و اورتا آسیا یئنی دهن کومونیزم ایدهیاسی ایله ایرهلیلهین روسلارین ترکیبینه یئرله شدیریلدی. بو گئدیشات شوروی ایمپیریاسی نین چوکمه سینه قدهر سوردو و نهایت باشقا میللت له یاناشی بئش تورک دولتی باغیمیسیز لیغینی الده ائتدی.
شوروی ایمپریاسی داغیلدیقدان سونرا باغیمسیز لیغینی قازانان قوزئی آذربایجان جمهوریتی نین بایراغی 20- جی یوز ایللیین اوللرینده اولدوغو کیمی محمد امین رسولزاده نین یاراتدیغی بایراق یئنی یارانمیش دولتین بایراغی سئچیلدی.
بورادا بایراق نه ین رمزی دیر و کیم لر طریندهن یارادیلابیلر؟ بایراق نهیی ایفاده ائتمه لیدیر و اونون یارادیلما سیندا هانسی عامیللر نظره آلینمالیدیر؟ سورغولاری اورتایا چیخیر:
بایراق نه ین رمزی دیر و کیم لر طرفینده ن یارادیلابیلر؟
بایراق هرهانسی بیر میللتین دولتینی او میللتین باشقا دولتیندهن و یا خود هرهانسی بیر میللتین دولتینی باشقا بیر میللتین دولتیندهن فرقلندیرهن بیر دولت آتریبوتو دور. بونا اورنک بوگون تورک میللتی نین هله لیک بیرلشمیش میللت لر تشکیلاتی طرفیندهن تانینمیش بئش دولتی و بو دولت لرین اوزلرینه مخصوص بایراقلاری دیر. باشقا بیر اورنک ایکی یئره بولونموش کوره میللتی دیرکی، اونا بیر بیریندهن فرقلی و حتی ضدیتلی ایکی دولت حکومت ائدیر و هر ایکی دولتینده اوزلرینه مخصوص ایکی بایراغی وار. بئله لیک له بوگون دونیا دا دالغالانان بایراقلار میللت لرین ساینا گوره یوخ، دولت لرین ساینا گوره دیرلر.
بایراق کیملر طرفیندهن یارادیلا بیلر؟
بایراق کیملر طرفیندهن یارادیلا بیلر؟ سورغوسونون جوابینا گلدیکده ایسه یوخاریدا قئید ائتدیمیز کیمی، بایراق کئچمیشلرده حاکمیته گلمک ایستهین، بیر و یا خود بیرنئچه میللتی اوزونه تابع ائتمک ایستهین شخص لر طرفیندهن یارادیلیردی. بونا اورنک تورک دونیاسیندا حکمرانلیق ائدهن تورک شاهلار سولالهسینین بایراقلاری دیر. چاغداش دورده ایسه بایراق شرایط دهن آسیلی اولاراق میللتینین موجود دورومو (اسارتی) ایله راضیلاشمایان و اونون باغیمسیز لیغینی دوشونن سیاسی بیر تشکیلات و یا خود تشکیلاتلار طرفیندهن یارادیلیر. نئجهکی، قوزئی آذربایجانین سیاسی خادمی محمد امین رسولزاده فیکیرداشلاری ایله بیر لیکده بیرینجی دونیاساواشیندان سونرا قافقازدا گورجولرین وارمنی لرین سیاسی چابالارینی دویار کن بوگونکو قوزئی آذربایجانین بایراغینی یاراتدی.
تأسف لر اولسون کی، 20-جی یوز ایللیک ده دورد انقلابین باش وئردیی گونئی آذربایجاندا، گونئی آذربایجان بایراغینین یارادیلماسی نین شاهدی اولمادیق. بو ایسه سوزو گئده ن انقلابی حرکاتلارین چاتشیمایان جهتی سایلاراق بیر گوناه کیمی انقلاب باشچی لاری نین خصوصی ایله بیر ایله یاخین گونئی آذربایجاندا حاکمیت ده اولان پیشه وری نین اوزهرینه دوشور. نیه کی، پیشهوری نین باشچیلیق ائتدیی 21 آذر حرکاتی طرفیندهن بیر بایراق یارادیلسایدی ان آزی گونئی آذربایجان میللتی 1357 – جی دئوریمنده نه ایسته دینی دوزگون بیله ره ک پهلوی سولاله سی نی دئویردیکده ن سونرا دین پردهسی ،آدی آلتیندا باشقا بیر شئونیستی حکومتین حاکمیته گلمهسینه ایمکان وئرمزدی و بوگون گونئی آذربایجان میللی حرکاتی نین یوکو گونئی آذربایجان میللیتنی آییتماقدا بوقدهر آغیر اولمازدی. نه ایسه کئچمیش تاریخدیر و تاریخده کی لری تنقید ائتسه ک ده اونلاری محاکمه ائتمک اولماز.
ییرمی بیرینجی یوز ایللیک ده گونی آذربایجان تورک لری نین موجود دورومو (اسارتی) ایله راضیلاشمایان، اونلارین باغیمسیز لیغینی دوشونن، گونئی آذربایجاندا مدنی حرکاتی سیاسی لشدیریب اونو بین الخالق عالمده تمثیل ائدهن و میللتینی اوز دولت بایراغی آلتیندا شرفلندیره ن گونئی آذربایجان میللی حرکاتی طرفیندهن باشدا میللی اونده ریمیز دوکتور چوهره قانلی اولماقلا گونئی آذربایجانین بایراقی تقدیم ائدیلهرهک، گونئی آذربایجان فعاللاری نین بز قالاسینداکی قورولتاییندا، گونئی آذربایجانین گلجک دولت بایراغی کیمی تصدیق لندی.
گونئی آذربایجان فعاللاری نین بز قالاسی قورولتایندا تصدیق لنن گونئی آذربایجانین بایراغی ساده جه گونئی آذربایجان دولتی قورولدوقدان سونرا، گونئی آذربایجان پارلامنتی نین طلبی ایله گونئی آذربایجان دولتی طرفیندهن رفراندوما قویولوب، گونئی آذربایجان میللتی نین سس چوخلوغو ایله دیشدیریله بیلر. هه له لیک میللی حرکاتیمیزین، کورسو آلتیندا حاضیرلانیب چایخانلاردا چیخان باشقا بیر بایراغا احتیاجی یوخدور. اوز شخصی سلیقه لرینه گوره بایراغیمیزی به یه نمه ین خارجده کی دوستلاریمیزا چاتدیرماق ایسته ییریک کی، گونئی آذربایجان میللی حرکاتینا ضرر یئتیرمک فیکریننیز یوخدورسا، بایراقلا باغلی ایسته ینیزی میللی دولتمیمیز قورولانا قدهر جیلولاین.
بایراق نه یی ایفاده ائتمهلی و اونون یارادیلما سیندا هانسی عامیللر نظره آلینمالیدیر؟
بایراقدا ایفاده اولونان عنصرلر، بیر میللتین میللی منسوبیتی، دینی اعتقادی ، اسکی اینانجی، دونیا گورشو، باشقا میللت لره اولان مناسیبتی و ... دیر بو عنصر لر اولابیلسین کی، بیری و یاخود بیرنئچه سی اساساً رنگلر و علامترلر واسیطه سی ایله بایراقدا ایفاده اولونسون، بونا اورنک آذربایجان و تورکیه بایراقلاریندا چاغداشلیق آنلامینی داشییان قیرمیزی رنگ و آزادلیق آنلامینی داشییان هلال شکلینده اولان آی علامتی دیر.
بایراغین یارادیلما سیندا هانسی عامیللر نظره آلینمالیدیر؟ سورغوسونون جوابینا گلدیکدهایسه یوخاریدا قئید اولونان هانسی عنصرلرین داشیدیغی اهمیتی و اونون شرایطدهن آسیلی اولاراق هانسی مقداردا و اولچوده ایفاده اولونماسی نظره آلینمالیدیر. اورنک اولاراق قوزئی آذربایجانین بایراغیندا گوی رنگ تورک له شمه نی، قیرمیزی رنگ چاغداش لاشمانی و یاشیل رنگ ایسه اسلام لاشمانی تمثیل ائدیر. آنجاق تورکیه تورک لری نین میللی منسوبیتی (تورک لویو) و دینی منسوبیتی (مسلمانیلغی) ههدهلهنمه دیینه گوره تورکیه بایراغیندا تورکلمشک و مسلمان لاشماق عامیللری نظره آلینمایب. نیاکی، هامی اوزونو یئتهرینجه تورک و مسلمان تانییر. اونلارین گرهک لی احتیاجی چاغداشلاشماق دیرکی، بایراغیندا ایفاده اولونوب. بونا اورنک بو اولکه نین آوروپا یونلو خارجی سیاستی دیر. آنجاق ایکی یوز ایله یاخین خریستیان روسلارین اسارتینده اولان و ارمنی لرین چوخ سایلی هجومونا معروض قالان قوزئی آذربایجان تورک لری نین بایراغیندا چاغداشلاشما قلا یاناشی تورک لشمک له مسلمانلاشماق ایفاده اولونمالیدیر. نیاکی، قوزئی آدربایجان تورک لری نین تورکلویو و مسلمانلیغی خریستیانلار طرفیندهن تهلوکه لرله اوزله شیب. تورک سویوندان و کوکوندهن اولان قوزئی آذربایجان تورک لری بوگونه قدهر آذربایجانلی، آذری کیمی آدلارلا يادلاشديريليبلار، اهالي نين اكثر حيصهسي دانيشديقلاري تورك ديلينه تورك ديلي يوخ، آذربايجان، آذري ديلي و ميللي منسوبيتيني ايسه تورك يوخ، آذربايجانلي و آذري آدلانديريرلار. بو، حتي قوزئي آذربايجانين آنا ياساسيندا دا قيد اولونوب دور.
گونئي آذربايجان تورك لرينين ميللي منسوبيتي شئونيست فارسلار طرفيندن انكار ائديلسه ده معين توكه نمك ده اولان كمونيست لري چيخماق شرطي ايله؛ گونئي آذربايجان تورك لري اوز ميللي منسوبيتيني اولدوغو كيمي تورك تقديم ائدير و دانيشديقلاري ديلي ده اولدوغو كيمي تورك ديلي آدلانديريرلار. گونئي آذربايجان توركلري نين مسلما نلیغي هئچ بير تهلوکه ايله اوزله شمه يب و بوگون ده تهلوكه قارشسيندا دئيیل. آنجاق چاغداشلاشماق بوگون بوميللته گره ك لي بير احتياج سايلير. محض بوناگوره ده چاغداشلاشماق گونئي آذربايجانين بايراغيندا اوزونه داها چوخ يئر آیيريب.
بئله ليك له گونئي آذربايجانين بايراغيندا گوي رنگ قوزئي آذربايجانين بايراغيندا اولدوغو كيمي تورك له شمك آنلاميني داشيير. قيرميزي رنگ قيد ائتديميزكيمي، چاغداشلاشماق و صفوي لرده ن بري يادگار قالان ياشيل رنگ مسلمانلاشماق آنلاميني داشيسادا، صفوي لر دونه مينده افراط شيعه چيليك ـ سنّي تورك لرين تپه سيني ازمك ـ آنلاميني داشييان ياشيل رنگ بوگون گونئي آذربايجان بايراغيندا اوزگور مسلمان آنلاميني داشيير. قيرميزي حيصه نين اورتاسيندا هلال شكلينده آي آزادليغين تمثالي دير. اونون قارشيسينداكي سکكيز گوشه لي اولدوز ايسه تورك ميللتي نين دولت آنلايشي ايله باغلي دير. توركون دولت آنلايشيندا دورد اساس يون (جهت)، دورد ده آرا يون واردير. بو يون آنلايشي دا توركون دونيا حاكيميتي ايده ياسي ايله سسله شير. بايراغيميز داكي آي و اولدوزون آغ رنگ ده اولماسينا گلديكده آغ رنگ بيزيم ان قديم ايناميميزا اساساً اولولوق، عدالت و گوجلولويون رمزي دير. او همده پاكليغين و حكمرانليغين سيموولودور.
آراز قاراباغلی
+
نوشته شده در ساعت توسط YURDƏR
|
