شرفلي آذربايجان تورك ميللتي ويئنيلمزحركتچي ميللت چي لر

بيلديينيز كيمي موراجعتيميزين بيرينجي بؤلومونده ، ميللي بايراقلا باغلي ، لازيم اولان موضوعلارا توخوناراق، بايراغيميزين نده ن بو فورما و ياپيدا اولماسي، قونوسونا وارديق، ايندي بو موراجعتيميزين بو بؤلومونده- بو قونويا لازيم اولدوغو قدر توخوناجاغيق.

ائله كي دئديك، بايراق بير ميللتين ميللي وارليغينين تمثيلچي سي، نوماينده سي، سيمگه و سيموولودور. بايراق هرميللتين عصاره وخلاصه سي دير.ميللي وارليق، بير ميللتي ميللت ائدن عنصرلردئمك دير. ميللتي، ميللت ياپان عنصرلرده، او اولوسون كئچميشي، تاريخي ، وطني،كؤك و سويو و اعتقادلاري ، اينانجلاري، پيسيكولوژيك و سوسيال داورانيشي، عادت عنعنه لر، سنت لر، ادبيات، فولكلور، موسيقي و ديلي دير، يعني بير آنلامدا كولتور و مدنييتي دير. 

بئله ليكله ميللي بايراق بوعنصرلرين گؤسترگه سي و تظاهورو  اولماليدير. بو قورال و قاعده لري نظرده  آلاراق، آذربايجانين تاريخ چي لري، پولوتيك چي لري، كولتور و مدنيت اوزمان لاري و

سايير گره كن اختصاص چي لاري توپلانيب، 1918 ده اصلييتي گونئي لي اولان باباميز، محمد امين رسولزاده اؤنده رلييينده ، آزادليق و ايستيقلالينا قوووشموش، وطنيميزين بير حيصه سينه، ميللي بايراق تعيين ائتميش لر.

نئجه كي جان و روحون ساغ سولو اولماز، ميللتين ده  بير وجود و بير وارليق آنلاميندا، ائله جه ده وطنينده بير معنوي وارليق مفهوموندا ايكي چئشيت - بيرچئشيت لييي اولا بيلمز، چونكو او تايليني ميللت ائدن عنصرلر- بو تايليني ميللت ائدن عنصرلر له عئين دير. دوشمنين تجاووزو نتيجه سينده، بير جغرافيا وبير توپلوم ايكي و يا نئچه حيصه يه، آذربايجانيميزين 1813 و 1828 لرده ، روس و فارس الييله بؤلوندويو كيمي، بؤلونه بيلر، بيلدييينيزكيمي بو بير فيزيكي بؤلونمه دير، آما معنوي آچيدان هئچ قدرتين، بير اورتاق معنوي وارليغي، بؤلوب ايكي ائتمه يه گوجو يئتمز.ال و آياق ايكي سيده بير وجودون پارچالاريدير، اونلاري بير- بيريندن آييرماقلا، هره سينه بير

مستقل آيري وجود دئمك ممكن دئييل سه، وطن و ميللت ده عئين اؤيله دير.

 سوندوغوموز دليل لره گؤره ، قوزئي و گونئيين بايراق ياپي و عنصرلرين عئين اولماسي، ظاهري گؤرونوشون عئين

اولماسي آنلاميندا دئييل.فيزيكي آچيدان ايكي حيصه يه بؤلونموش ميللتين ، ايكي بايراق قالديرماسي دا، اينديكي دورومدا، وار و موجود اولان شرط لره گؤره دير (عئينا ايكييه بؤلونموش، آلمانيالار، يمن لر ويتناملار و كورئالار كيمي، ايكي حيصه يه بؤلونمك مجبورييتينده قالان، ايكي بايراق قالديريلير، آما  پارچالانميش ميللتين عزم و اراده سي سونوجوندا، بؤلونموش ميللت بيرله شيرسه، بايراقلاردا بيرله شر، ايكي يه بؤلونموش آلمانيانين بيتؤوله شدييي تقديرده ، ايكي بايراغين بيرله شدييي كيمي). بيلدييينيز كيمي بايراغين هر جزء وعنصرو بير و يا نئچه مفهوم و آنلام داشيمقدادير، منيم بيلديييمه قدر، آذربايجان بايراغيني تكميل لشديرن عنصرلرين آنلامي آشاغيدا گلدييي كيميدير:

گؤي و يا ماوي بويا: توركلوك و تورك چولوك ، اوجاليق، يوكسه ليش و اوجالارا  وارما و يوكسلمه نييتينده اولماق آنلاميندادير، بيلدييينيز كيمي بايراق هر ميللتين دوشونجه و معنوي دونياسينين سيمگه و سيموولودور، دونيانيندا ان اوست حيصه سي ماوي بويادا اولان گؤي لر دير، اونا گؤره بير رئال گرچك و طبيعي عنصرده ساييلا بيلر، ماوي بويا ، ريفاه ، بوللوق، راحاتليق و دينجليك، ووقار و عئين زاماندا گنجليك آنلاميندا گليب دير.

آل و يا قيرميزي بويا: بير آنلامي، قدرت، گوج، گليشمه ، تمدن ، ترقي ، تكامل، چاغداشليق و معاصرلشمه دير، چاغداشليق و يا معاصرلشمه ، بو آنلامدا دئييل كي آذربايجان تورك ميللتي، اؤز منليك و كيمليييني اونودوب باتي كولتورلرده اريييب آسيميله اولسون، بلكه بو آنلامدادير كي ميللتيميز اونو ميللت ائدن تمل عنصرلري ، قورويوب ، گوجله نديريب ، ساخلاياراق، باتي مدنييتينين، باتي گليشمه سينين، باتي بيليم و علمينين، مثبت يؤنلرينده هئچ بير انگل تؤره تمه دن توم ياشام ساحه سينده فايدالانا بيلسين.قيرميزي بويانين بير آنلاميدا بايراغين چوخ ده يرلي، قييمتلي  و پاك قانلارباهاسينا اله گلديييني يانسيتماقدادير، يعني بايراغي،بايراق ياپان، اوغروندا وئريلن قاندير. مع الاسف، قانسيز بايراق ياپيليب، دالقالانمير. بيرينجي موراجعت ده  دئديييم كيمي بابالاريميز كئچن 98 ايلده آزادليق، دئموكراسي و ايستيقلال اوغروندا 100 مين لر اينسانيميزي قوربان وئرميشلر و حالا باشيميزين اوستونده دالقالانان بايراق اؤز بايراق دئييل دير. قيرميزي بويانين ياشيلليق(يئر) و ماويليك ( گؤي) اورتاسيندا گلمه سينين بير آنلاميدا بايراق اوغروندا  نه قدر زحمت لر چكيلديييني، مصيبت لر و اشكنجه لر گؤرولدويونو، پاك و مقدس قانلار ايتهاف ائديلديييني و يئرله گؤي آراسي يعني توم دونياميزين قانلا دولدوغونو ترجومان ائتمك ده دير.

آغ بويالي آي و سگگيز بوجاقلي اولدوز: بيلدييينيز كيمي خيريستيان عالمي و جامعه سينسن ان اؤنملي سيموولو، صليب و يا خود خاچ اولدوغو كيمي، گئنلليكله  دوغو و يا موسلومان واؤزه- لليكله بؤيوك تورك دونياسينين دا ان اؤنملي و ده يرلي سيموولو آي و يا آي و اولدوز

اولموشدور، كئچميشده و حال حاضير ده تورك سولاله سيندن اولان تورك حاكمييت و يا دؤولت لرين بايراق لاريندا بيرويا نئچه آي و بعضا ده اولدوزلا بيرليكده اولموشدور، بو فاكتي نظرده آلاراق و بيزده كنديميزي چوخ عظمت و احتيشاملي بابالاريميزين خلف و غئيرتلي تورونلاري حساب ائده رك ، او سئويملي و اونور قايناغي سانيلان علامت و نشان لارين ، باشيميز اوستونده دالقالانماقدا اولان بايراغيميزدا  اولماسين و دالقالانماسين ايستيريك. آي و اولدوزون آغ بويا دا اولماسينين بير آنلاميدا تورك ميللتينين ساواشجيل  يوخ،  بلكه باريشجيل، صلح و امن- آمانليق سئون ميللت اولدوغونون گؤسترگه و تطاهورودور.آي و اولدوزون آغ بويا دا اولماسينين بير آيري آنلاميدا قارانليغي يوخ بلكه ايشيقليغي سئومك، نور و ايشيقليقدا ياشاماقدير. اولدوزون سگگيز بوجاقلي اولماسينيندا نده ني بودور كي، آذربايجان بؤلگه سينده اولان تورك كؤكه نلي دؤولتلرين بايراقلاريندا ، چوخونلوقدا، سگگيز بوجاقلي اولدوزاولموشدور.اولدوزون سگگيز بوجاقلي اولماسينين بير آنلاميدا بودور كي - بير سؤيله مه گؤره - اوغوز بويلاري دوققوز اولموشلار وهميشه بويلارين بيري حاكبيميت ده اولاراق ، سايير سگگيز بويا حكم سورموشدور.  اونا گؤره بايراق حاكيبميت ده اولان بويو و سگگيز اولدوزدا، سايير بويلارين آنلامي گؤسترگه- سي و تظاهورودور.

ياشيل بويا: بيلدييينيز كيمي هر بير ساغلام اينسان يئر اوزونون ياشيل اولماسين ايستر، بونا گؤره كي ،ياشيلليق هاواني پاكلايان ، اوكسيژئني آرتيران، دي اوكسيد كربونو آزالدان، ياشام، حايات ، بوللوق ونعمت ، عمران و آوادانليق آنلاميندا داشيماقدادير، بير آيري سؤزله ياشيلليق دونيانين گئنج، ديناميك و هپ باهار و ياز چاغيندا اولماسي ايسته يي آنلاميندا يانسيتماقدادير. بيلدييبنيز كيمي بؤيوك تورك دونياسي و اؤزه لليكله آذربايجان تورك لري، ياخلاشيق، 1200 ايلدير كي ايسلامييت قبول ائديب، موسلومان اولموشلار. 1918 ده آذربايجان بايراغي ياپيليب  تعيين ائديله نده ، اوچ تمل و بينؤوره سانيلان، اصل و پرينسيبه ان چوخ اهميت وئريلميشدير. توركچولوك

 و ماوي بويا اونون گؤستر گه سي، چاغداشليق و قيرميزي بويا اونون گؤسته رگه- سي و ايسلامييت و يا خود موسلومانچيليق و ياشيلليق اونون گؤسته رگه سي، حساب ائديليب

 و سئچيلميشدير.

گونئي آذربايجان ميللي اويانيش حركاتي (گاموح) ، گرچكدن چوخونلوغو موسلومان اولان،  

نئچه ميليونلوق تشكيلاتدير، بو تشكيلات بابالاريميزين چيخارديقلاري قرارلاري و همده موجود اولان قوزئي آذربايجانين بايراغين منيمسه ييب، ان صميمي سئوگي و سايقي سيني بليرته رك،

اوجا ايسلام دينينين اوصول وقوراللارين نظرده آلاراق، (ايسلامدا بير وارليغي قبول ائديب و ائتمه مك ده، بير شئيه اينانيب-اينانماماقدا، زوراكيليق و مجبورييت اولماماليدير) و ان مكمل شكيلده دئموكراسيايا ايناناراق ، ميللتيميزين هر حاليكاردا، چوخونلوغونون اينانديغي ايسلام دينينه، مذهب آييريمي ياپمادان، سني - شيعه  و يا خود جعفري- علوي و ...دئمه دن، ان درين حؤرمت و سايقي سيني ثبوت ائديب، بليرته رك (حتي بئله موسلومان اولماساق داهي و سايير دين و اينانجلارا (دئموكراسيا، انسان حاقلاري، وجدان حرييتي و منطق چرچووسينده) سايقي و حؤرمتله داوراناراق) ، يوخاريدا سايديغيميز اوصول و اوچ پرينسيبه بعضي دئييشيكليكلر وئرميشدير.  يعني  گاموح تشكيلاتي مرامنامه سينده عكس اولدوغو كيمي، توركچولوك ، چاغداشليق،اينانج آزادليغينا اينانماقدادير، بئله ليكله يوخاري و سول بوجاقدا اولان اوچ گئن (مثلث) ماوي اولاراق ، توركچولويوموزو، اورتادا آشاغي و يوخاري دا اولان قيرميزي بويا ، چوخونلوغو بايراغين ساغ طرفينده اولاراق، معاصرلشمه و يا خود چاغداشليغيميزي و بايراغين آشاغي و سول طرفينده، ياشيل بويادا اولان اوچ گئن، اينانج و اعتقاد اوزگورلويونه ، اؤنم و اهمييت وئرديييميزي  يانسيتماقدادير.بايراغين شكيل، فورما ، ياپي و دوزه ليشده بللي اولدوغونا گؤره آچيق ليق گتيرمه نين گركمه ديييني اينانيريق.

ده يرلي گونئي آذربايجان تورك ميللتي و شرف و جسارت قايناغي اولان، تورك ميللتچي لري، كندي و اؤز بايراغيميز باشيميزين اوستونده دالقالانماقدا اولدوغوندا ، داها  تهراندا حاكيم اولان فارس شووينيزمي بيزلره، قوزئي آذربايجان و توركييه جاسوسلاري، تهمت و دامغاسيني وورمايي  باجارماياجاق، بئله ليكله بو اؤنملي قوز(پوان) و، ان ويجدانسيز دوشمنيميزين اليندن آلميش بولونماقداييق.

اوجا ميللت و چوخ غئيرتلي حركتچي ميللت چي لر، لطفا بوتون ميللت لرين بايراقلاريني،

اؤزه- لليكله تورك ميللت لري بايراقلارينا، سايقييلا ياناشاراق، قوزئي آذربايجان بايراغيني اؤز بايراغيميزلا ايكيز و توركيه بايراغيندا، دوغما قارداش بايراغي بيلمه ليييك.

لطفا بايراغيميزي تانيياليم؛

 لطفا بايراغيميزي تانيتديراليم؛

 لطفا بايراغيميزي ياپيپ، ياياليم؛

لطفا بايراغيميزا، اوره ييميزين ان ايستي و سيجاق يئرينده يئر وئره ليم؛

لطفا بوندان سونرا بوتون ميللي توپلانتي و قورولتايلاردا ،اؤز ميللي بايراغيميزي باشيميز اوسته قالديراليم؛

لطفا او، ان غزيز و ان ده يرلي وارليغيميزي ، سئوه رك قوروياليم .

ياشاسين آذربايجان تورك ميللتي

محو اولسون آلچاق فارس شووينيزمي

آذربايجان تورك ميللتينن ان رتبه سيز عسگري- م . ع . چهره قانلي

واشينگتون- آمريكا  2003/03/04