اوجا ميللت و شرفلي حركت چي ميللت چي لر

بابالاريميز دئميش كي"آز ياشا آزاد ياشا"،اولوسال و حیماسي قهرما نيميزبابك ده  دئميش كي "بير ايل

 آزاد ياشاماق، قيرخ ايل كؤله ليكدن اوستوندور،" گئنه باباميز خيیاباني رحمتليك بويورموش "اگر من

ايستيبداد و ياشاماقلا، آزادليق و اؤلومون ايكيسيندن بيريني قبول ائتمك زوروندا قالسام آزادليق و اؤلومو

 سئچه رم".                                     

ده يرلي ميللت! بيلدييينيز كيمي هر ميللي شعورا ماليك اولان و آييق- ساييق ميللتين ان قييمتلي وارليغي اونون

ميللي وارليغي دير. بو وارليق او قدر عزيزدير كي شرفلي ميللت لر اونون قورونماسي و قاليب ياشاماسي

 اوچون بوتون اؤزل وارليق لاريني فدا ائتمه يه حاضير اولارلار،ايندي گؤره ك  اؤزل وارليق نه دير و ميللي

 وارليق نه دئمك دير؟                            

هر اينسانا عاييد اولان بير پارا وارليقلار وار، بو وارليقلار ايكي جور دور:

 1- ماددي:هر اينسان و يا عاييله يه منصوب اولان ماددي وارليق لار،ائو،آرابا ، باغ، باغچا و يا سايير بونلار

 كيمي شخصي و يا عاييله وي وارليق لار.                                               

2- معنوي :شخص و يا عاييله نين دوشونجه سي ، اينانجلاري،كاراكتر و پرئستيژي ، آبير-حئيثييتي ، شرف و

 بونلارا بنزه ر سايير وارليق لار.                                                              

بيلدييينيز كيمي ميللي وارليقدا ايكي حيصه يه بؤلونور:                                                   

1- ماددي: يعني بير شخص يوخ بلكه بير ميللته عاييد اولان توم ماددي وارليق لار، دنيز لر، چايلار،

مئشه و اورمانلار، توم يئر آلتي ثروتلري، معد ن لركيمي، يوللار،  عمومي بينالار، پاركلار و ... 

 2- معنوي: هر ميللتين وطني ، تاريخي ، كئچميشي ،اينانج ، ايدئولوژي و دوشونجه لري ، كولتور،

مدنييت، موسيقي، عادت لر، سنت لر ، عنعننه لر، ميللي گون لر، ميللي قهرمانلار ، بايراملار، كلاسيك

 ادبيات، فولكلور،و بونلارين هاميسينين ايكي گوزو ، چيرپينان يوره يي و آراشديران بئييني اولان ، ديلي،

 اونون معنوي واليغي تانينير و سانيلير.                            

    بو ايكي حيصه يه بؤلونن وارليغا ميللي وارليق دئييرلر. دونيا نين ان گليشميش ،مترقي و گوجلو و درين

 كولتورلره ماليك اولان ميللت لري ، ميللي وارليقلاريني قوروماق و اوندان هر تور تعددي و تجاووزو دفع

 ائتمك اوچون هر شئي لريني ، حتي اؤزل آبير و حئيثييت لريني قوربان وئرمه يه حاضير اولورلار، ميللي

 وارليق بير ميللتي ميللت ائدن عنصر لر دير.               ميللي وارليق ،ميللي آبير ، ميللي حئيثييت ، ميللي

 ناموس و ميللي شرف دئمك دير، بئله ليك له، اؤزگه لر و يابانجي لار توسطو ايله وطنه، ديله و يا ميللي

 وارليغين هر بير حيصه سينه آياق باسماق، قاداغالار قويماق و زوراكيليقلا بونلارا بنزر هر بير عمل، ميللي

 وارليغا تعددي و تجاووز سانيلارو تانينار، آچيق و آيدين اولاراق ناموس و شرف آنلامين بيلن بير ميللت، اؤز

 ميللي وارليغينا تجاووزو  قبول ائتمز و سايير ميللت لرين ميللي وارليقلارينا آياق باسماز. گئنه بللي اولاراق هر شرف معناسيني آنلايان بير ميللت ، توم اوزل وارليغيني فدا ائتمه يه و ميللي شرفينه سورولن قارا تجاووز لكه سيني

 سيلمه يه حاضيراولار. بوتون آذربايجانين و اوزه لليكله گونئي آذربايجانين ، وضعييت و دورومو هامييا

 بلليدير و هر بيريميزين وظيفه  و گؤره ويده بلليدير- بونا آچيق ليق گئتمه يه گرك يوخ.                                                        

ايذين وئرين دئييم ، لطفا مني باغيشلايين، قارداشلارو باجيلار ! اؤج و انتقام دويقوسي مني بوغاركن و

گوزله ريم ياشلا دولاركن، بو جومله ني سويله ييرم : فارس شوونيزمي الييله بيزيم ميللي وارليغيميزا قارا لكه سورولوبدور، شرفيميز وارسا اونوپاكلاماق زورونداييق.

"بسم الله يا ميللت بويورون ، ايشته مئيدان"

  بيلدييينيز كيمي قوللوق و كؤله ليكدن قورتولموش، آزاد و اؤزگور ميللت لر ، يابانجي لار و خصوصا ميللي

 شرف دوشمن لري حاكمييتين قبول ائتمزلر..                                       

 آزاد و اؤزگور ميللت لر، اؤز حاكمييت و اه گه منليك لرين قورارلار ...                                  

آزاد و اؤزگور ميللت لر، اؤز اينانجلاري ، اؤزدوشونجه لرييله و ايسته ديكلري كيمين ياشارلار...                                                                                                        

آزاد و اؤزگور ميللت لر، وطن لرين اؤزلري قورويوب و سينيرلارين كندلري  جيزارلار...       

قورخاق و آلچاق ميللت لرين موقددراتين ، يابانجي لار تعيين ائده رلر.                          

 كولتورلو و مدنيت لي ميللت لر ، نئقاتيوآسيميله اولمايي و ائتمه يي قبول ائتمز لر.              

بدوي ، كولتورسوز ، مدنييت سيز ، جسارت سيز و ديل سيز- آغيز سيز ميللت لرين ميللي وارليغي  اريييب ،

 يوخ اولار. ذكي و مودريك ميللت لر (هر نه يين باهاسينا اولور، اولسون) ميللت لرينين و ديللرينين اؤلومونه ،

 و دوشمن لري الييله تاريخين اؤلو ميللت لر و اؤلو ديللر قبريستانيندا گومله سينه ايزين وئرمه زلر.

اوجا ميللت، بيلدييينيز كيمي ، آزادليق ، اؤزگورلوك و ميللي حاكمييتين، سيمگه و سيموولو اولماليدير.تاريخ بويو ، آزادليق و اؤزگورلوك  و كندي حاكمييت لري آلتيندا ياشايان ،ميللت لرين سيمووللاري و سندلري ، بايراقلاري اولموشدور.                                                

بايراق آزادليق واؤزگورلوك سندي و فاكتيدير.                                                                

بايراق، حاكمييت و اه گه منليك سيموولودور.                                                                     

بايراق ميللت لرين حايات دا اولوب ،ياشاماسينين بليرتيسيدير.                                      

بايراق هر ميللتين ميللي ناموس و شرفي دير.اونا گؤره دئميشيك كي :                               

"شرفلي ميللت لر اوز بايراقلاري آلتيندا ياشارلار"  و "شرفلي ميللت لر اؤز بويوروقلاري آلتيندا ياشارلار".                                                                                                     

ده يرلي ميللت! بيلدييينيز كيمي، ايران آدلا نان اؤلكه نين باش كندي و اوردا دالقالا نان بايراق،

 بابا لاريميزين ياپديغي پايتاخت و بايراق دير، اما هر حالدا معلوم اولان دليل و نده ن لره گؤره- اينديكي

دورومدا (البته يوز ايله ياخيندير) آذربايجان توركونون ميللي وارليق و ميللي شرف دوشمنينين ، يعني فارس شووينيزمينين، سيمگه و سيموولونا چئوريليبدير، بو نده ن له ، ايراندا حاكيم اولان رئژيم ، گونئي آذربايجانين 35000000 تورك ميللتينه، ميللي حاكمييت ، تهران شهري باش كند ، و اوردا دالقالانماقدا اولان بايراق، ميللي

 بايراق سانيلا و تانينا بيلمز.            

اونا گؤره بيزيم اصيل دوغما وطنيميز آذربايجان، باش كنديميز آذربايجانيميزين تاريخي باش كندي اولان

 تبريزو ميللي ديلي ميزين آدي آذربايجان توركجه سي  و ميللي بايراغيميزدا آذربايجانين اوچ رنگي و

 آي اولدوزلو بايراغي دير.

بو، گونئي آذربايجانين ميللتينين اوز موقدراتيني الده ائتمك دئمك دير، بو دئموكراسي و اينسان حاقلاري پرينسيب لريني قبول ائتمك و ده ير وئرمك دئمك دير. بو حتي ايراندا اولان رئژيمين قبول ائتدييي و يا

 قبول ائتمك زوروندا اولدوغو، اولوسلار آراسي قبول اولونان قانون و ياسالارا عمل ائتمك دئمك دير.

(لطفا بيرله شميش ميللت لر تشكيلاتينين باش مجليسينين 1 دئكابر 1973- جو ايل 3103 ساييلي

قطعنامه سينه ، 1949- جو ايل ژئنوئر كونوانسييالارينا ، بيرله- شميش ميللت لر تشكيلاتينين باش

 مجليسينين بير دئكابر1948-جي و16 دئكابر 1966-جي ايللرده بئينالخالق و اينسان حاقلاري حاقيندا

 قبول ائديلميش بياننامه لرينه ، بيرله شميش ميللت لر تشكيلاتينين باش مجليسينين 24 دئكاير 1950- جي ايل 421 ساييلي قطعنامه سينه، 1960-جي ايل بياننامه سينه و سايير بيرله شميش ميللت لر تشكيلاتي  و

 اولوسلار آراسي(EF) اؤرگوتونون چيخارديقلاري و وئرديكلري قرارنامه لره ديقتله باخينيز).آما نده ن

 بو تركيبده بايراق، ايذين ايسته رم اونون جوابيني موراجعتيمين گلن بؤلومونده وئريم.     

ياشاسين آذربايجان ميللتي و ميللي وارليغي

محواولسون ميللي شرف دوشمنيميز، فارس شووينيزمي

ان درين سئوگي و سايقي لاريملا، محمودعلي چهره قا نلي

27 فئورال 2003 واشينگتون- آمريكا